பொலிஸாருக்கு இலஞ்சம் கொடுத்து விட்டு அனுமதிப்பத்திரமின்றி மணல் ஏற்றிய ஐந்து பேர் கைது

கிண்ணியா - சோலை வெட்டுவான் பகுதியில் அனுமதிப்பத்திரமின்றி சட்ட விரோதமாக மணல் ஏற்றிய ஐந்து சந்தேகநபர்களை இன்று திருகோணமலை விஷேட அதிரடிப்படையினர் கைது செய்துள்ளனர்.

இவ்வாறு கைது செய்யப்பட்டவர்கள் கிண்ணியா பகுதியைச் சேர்ந்தவர்கள் எனவும், தொடர்ச்சியாக சட்ட விரோத செயற்பாட்டில் ஈடுபட்டு வருபவர்கள் எனவும் பொலிஸார் கூறியுள்ளனர்.

கிண்ணியா பொலஸாருக்கு இலஞ்சம் கொடுத்து விட்டு சோலை வெட்டுவான் பகுதியில் அனுமதிப்பத்திரமில்லாமல் தொடர்ச்சியாக மணல் ஏற்றி வியாபாரத்தில் ஈடுபட்டு வருவதாக திருகோணமலை விஷேட பொலிஸ் அதிரடிப்படையினருக்கு இரகசிய தகவல் வழங்கப்பட்டுள்ளது.

இந்த தகவலையடுத்து சுற்றிவளைப்பை மேற்கொண்ட போதே இவர்கள் கைது செய்யப்பட்டதாக பொலிஸார் கூறியுள்ளனர்.இதேவேளை, கைது செய்யப்பட்ட குறித்த ஐவருடன், இரண்டு உழவு இயந்திரத்தையும் கிண்ணியா பொலிஸ் நிலையத்தில் ஒப்படைத்துள்ளதாக விஷேட பொலிஸ் அதிரடிப்படையினர் குறிப்பிட்டுள்ளனர்.

மேலும், கைது செய்யப்பட்வர்களை திருகோணமலை நீதவான் முன்னிலையில் ஆஜர்படுத்தவுள்ளதாகவும் கிண்ணியா பொலிஸார் கூறியுள்ளார்.